Vivimos nun ecosistema empresarial onde a competencia constante, a urxencia polos resultados inmediatos e a cultura do “gañar a toda costa” poden levar ao esgotamento de persoas, proxectos e relacións profesionais. Por sorte, cada vez máis emprendedores e empresas están a apostar por outro modelo: aquel no que a negociación non é un campo de batalla, senón un espazo de co-creación.
Este artigo afonda na negociación win-win (gañar-gañar) buscando unha práctica que favoreza acordos sostibles, relacionamentos duradeiros e a expansión real das persoas e proxectos implicados. Dende o Coworking Miño chegaremos ferramentas concretas para comercializar os nosos servizos con intelixencia emocional, estratexia e coidados.
Que significa negociar en clave win-win?
O modelo win-win parte dunha idea simple pero poderosa: ambas partes deben beneficiarse do acordo para que este sexa sostible no tempo. A diferenza doutras formas de negociar onde un “gaña” e o outro “cede”, neste caso buscamos a integración de intereses e a construción dunha relación a longo prazo.
Non se trata de “ceder por quedar ben”, senón de entender a fondo que necesita a outra parte, que podo ofrecer eu con honestidade, e como atopar ese punto onde ambas visóns encaixen. Acordos que non exploten, que non desgasten, que se poidan manter e mesmo expandir no tempo.
Que pode aportar a cada profesional?
- Seguridade nas relacións comerciais: Cando un acordo está baseado na transparencia e na vontade mutua de gañar, redúcese o risco de conflito, desconfianza ou ruptura prematura.
- Maior fidelización: Clientes, colaboradores ou provedores que se sinten escoitados e valorados, permanecen. E ademais, recoméndante.
- Reputación positiva: No contexto actual, onde a coherencia e a responsabilidade son activos estratéxicos, negociar con respecto mutuo posiciona a túa marca como profesional, ética e aliada.
- Crecemento compartido: As relacións win-win permiten que ambas partes evolucionen, se adapten e medren xuntas. Non son estáticas, senón vivas.
Negociación e psicoloxía social: comprender para comunicar mellor
A psicoloxía social pode axudarnos a entender como os procesos mentais, emocionais e de grupo inflúen nas nosas interaccións profesionais. A negociación non se dá nun baleiro: cada persoa chega cunha mochila de expectativas, medos, estilos de comunicación e formas de percibir a xustiza e as relacións.
Algunhas claves desde este enfoque:
- Percepción de xustiza: A teoría da equidade afirma que, máis alá do resultado obxectivo, as persoas avalían se o acordo foi xusto en función do esforzo investido. Sentirse tratado con equidade aumenta a satisfacción e a predisposición a futuras colaboracións.
- Estilos de comunicación: A asertividade é clave. Non se trata de impoñer nin de calar, senón de expresar con claridade o que se necesita sen agredir nin someterse. A comunicación asertiva xera confianza.
- Empatía activa: Non abonda con poñerse no lugar do outro, hai que escoitar activamente, validar as emocións e reformular o que a outra persoa expresa para asegurarse dunha comprensión real.
- Cohesión e influencia social:Nun contexto grupal, como unha negociación entre equipos ou socios, a cohesión interna e o recoñecemento mutuo fortalecen a posición común. Os acordos alcanzados con coidado destes aspectos tenden a ser máis sólidos.
Comprender estes principios permite crear un clima de negociación onde as partes se sintan cómodas, abertas e dispostas a colaborar. Isto non só favorece o éxito inmediato do acordo, senón tamén a súa sostibilidade.
Enfoque sociolóxico e económico: cara a unha comercialización sostible
A negociación win-win pode entenderse como unha ferramenta de transformación do mercado. Nun tecido produtivo que busca a supervivencia a longo prazo, os acordos baseados na cooperación, na confianza e na responsabilidade compartida xeran valor engadido non só para as partes que negocian, senón para o ecosistema enteiro. A comercialización sostible dos servizos implica tamén escoller con quen colaborar, en que condicións e baixo que valores. A capacidade de negociar co foco posto na interdependencia, máis que na competencia, redefine a produtividade dende unha lóxica máis humana, resiliente e expansiva.
Conclusión
Negociar en clave win-win non é unha estratexia viable nun contexto onde a sostibilidade dos proxectos está directamente ligada á calidade das relacións que se establecen. Incorporar esta visión dende a ética profesional permítenos construír acordos máis sólidos, respectuosos e duradeiros. Ao final, non se trata só de vender, senón de co-crear vínculos e proxectos que alimenten o crecemento compartido e benestar. E iso tamén é emprender cos pes na terra.
