O pasado 30 de outubro, o Coworking Miño – Casa do Pescador converteuse no punto de encontro das persoas xestoras dos doce espazos que forman parte da Rede Provincial de Espazos de Traballo Colaborativo da Deputación da Coruña.
A reunión, que contou coa presenza da deputada da área de Emprego Rosa Ana García e representantes da Cámara de Comercio de Santiago, serviu para poñer en común os avances e retos que afrontan estes espazos públicos de coworking, que se espallan por toda a provincia e dan servizo a centos de profesionais e proxectos emprendedores.
Compartindo experiencias e retos comúns
Durante a sesión, presentouse o balance da segunda edición do Rede Coworking Fest, no que se revisaron as actividades desenvolvidas nos distintos espazos e se analizaron as métricas de participación e impacto.
Tamén houbo tempo para falar sobre a xestión operativa dos coworkings, a asistencia presencial e, sobre todo, a importancia de reforzar a colaboración entre espazos. A Rede destacou a necesidade de seguir traballando conxuntamente para consolidar unha comunidade provincial que conecte talento, recursos e oportunidades en todo o territorio.
Espazos de transformación e emprendemento rural
Un dos temas destacados da reunión foi o papel dos espazos colaborativos de transformación, que combinan innovación, economía circular e recuperación de producións locais.
Entre eles, subliñáronse tres proxectos especialmente inspiradores:
- Transformando en Brión, un espazo centrado na transformación e aproveitamento de produtos agroalimentarios locais, como marmeladas, conservas vexetais e outros produtos elaborados no propio espazo. O seu obxectivo é impulsar a economía circular e o emprendemento no rural, ofrecendo formación práctica e acompañamento a persoas emprendedoras.
- A Fusquenlla (Moeche), dedicada á transformación de produtos lácteos e vexetais de proximidade, promove a produción artesanal a pequena escala e proporciona recursos e formación para desenvolver proxectos agroalimentarios sostibles.
- Coworking de Baroña (Porto do Son), recentemente incorporado á Rede, aposta pola transformación cárnica artesanal e a innovación agroalimentaria, servindo de punto de encontro para profesionais e produtores da comarca do Barbanza.
Provincia Emprendedora e visión de futuro
A xornada tamén incluíu a presentación do programa Provincia Emprendedora, da man da Cámara de Comercio de Santiago, destinado a apoiar a creación e consolidación de empresas na provincia.
O encontro rematou cun espazo de café e networking nas instalacións da Casa do Pescador, que permitiu intercambiar ideas, experiencias e novas propostas para o futuro da Rede.
Con esta reunión, o Coworking Miño reforza o seu papel como espazo activo dentro da Rede Provincial, impulsando a innovación, a cooperación e o desenvolvemento do emprendemento local.
